في العجلة الندامة وفي التأني السلامة

في العجلة الندامة وفي التأني السلامة

--------------------------------------------------------------------------------

من مشهد قصة جبتلكم مقتطف منها مع تحوير اللغة الى العامية بتصرف طبعا:

*****
أبو دحام أرخميدس صاحب احدى البقاليات ويعرف جميع اهل الحارة زاره السيد أبو غازي.
أبو غازي: السلام عليكم
أبو دحام : وعليك السلام يابن الكرام تفضل أمرني
أبو غازي : مايؤمر عليك ظالم بس مابدي أشتري بدي اقعد عندك اشرب فنجان قهوة
أبو دحام : مية هلا تفضل نورت المحل
أبو غازي : تسلم ياطيب
أبو دحام : أبو ايش بلاصغرة
أبو غازي: بقولولي أبو غازي
أبو دحام : اهلا وسهلا بيك سيد أبو غازي
أبو غازي :تعيش , انت أبو دحام ما؟
أبو دحام: أي انا بذاتو
أبو غازي : دلوني لعندك جماعة وبدي أسألك عن شخص
أبو دحام : تفضل
أبو غازي : بدي أسألك عن جارك أبو محمود
أبو دحام :ولله زلمة محترم
أحد الفقراء البائسي المظهر يدعى فرحان يخرج من بيت أبو محمود
أبو دحام : فرحان تعى لهون
فرحان : خير اش في
أبو دحام : اش كنت تسوي عند أبو محمود ؟
فرحان : ماكنت سوي شي بس عطاني مصاري
أبودحام : شفت بعينك ياأبو غازي الزلمة مافي أكرم منو
أبو غازي : أي ولله هيك الظاهر كثير كريم
أبو دحام :بالفعل الزلمة قمة بالأخلاق
أبو غازي : انت بتعرفو منيح يعني
أبو دحام : أنا يالي بعرفو وأنا ببصملو بالعشرة
أبو غازي : معناها مارح ننغش فيه
أبو دحام : معناها أكيد هو جاي يخطب من عندك وانت جاي تسأل عنو
أبو غازي : أي ولله بس هلق اطمنت
أبو دحام : حط ايديك وأجريك بمي باردة, الزلمة مثال للشرف
أبو غازي : انا سبق وقالولي هالزلمة منيح بس حبيت أتأكد
أبو دحام : نصيحة مني لا تقطع بنصيب بنتك مع هالعائلة الكريمة
أبو غازي : أي ولله بكون غبي اذا مارضيت بيه
أبو دحام : بعدين الزلمة الله مأنعم عليه اللهم لا حسد
أبو غازي : أهم شي أخلاقو والحمدلله طلع ابن أصل
ابو دحام : بس النقطة وين انو بيعطي الفقير ومابخلي حدا يعرف يعني صاح لهالفقير فرحان لبيتو مشان يكرمو مشان ماحدا يشوفو
أبو غازي : الحمدلله انو قدرنا نشوفو لفرحان بعد ماتصدق عليه أبو محمود وعرفناه شهم
أبو غازي : ياأخي حبيتو لهالزلمة
أبو دحام : شي طبيعي تحبو لاني أمثالو قلال كثير
أبو غازي :شايف هذا فرحان طمع بكرمو لصهرنا وراجع لعندو
أبو دحام :هلق بسألو ليش رجع . تعى ولك فرحان تعى لهون
فرحان : خير اش بدك أبو دحام؟
أبو دحام : شو شايل بهالكيس ؟
فرحان : قنينة بيرة جايبها لمعلمي أبو محمود
أبو غازي مندهشا : شو عمتقول انت !!!؟
أبو دحام : ولله هالزلمة مخبى بثيابو
أبو غازي : ولله ماتوقعت منو هالشي
ابو دحام: شفت بعينك يأبو غازي الزلمة مافي احقر منو
أبو غازي : أي ولله هيك الظاهر كثير حقير
أبو دحام : بالفعل هالزلمة بقمة الانحلال
أبو غازي : موعاساس انك بتعرفو منيح ؟
أبو دحام : كنت مفكر اني بعرفو بس ههلق اذا بشوفو بلزقو كفين بالعشرة
أبو غازي: معناها نغشينا فيه
أبو دحام: معناها اياك تخليه يخطب من عندك بعد ماجيت سألت عنو وعرفت حقيقتو
أبو غازي : أي ولله بس هلق أتكدت
أبو دحام: اذا جا يخطب من عندك حط رجليك وايديك بضهرو وقلعو , الزلمة مثال للسفالة
أبو غازي : أنا سبق وقالولي هالزلمة واطي بس حبيت أتأكد
أبو دحام : نصيحة مني لا تعطيه بنتك حتى وكان من عائلة غنية
أبو غازي : أي ولله بكون غبي أذا عطيتو بنتي
أبو دحام : بعدين الزلمة الله عامي على قلبو اللهم عافينا
أبو غازي : أهم شي عرفنا أخلاقو والحمدلله انا كشفناه لقليل هالأصل
أبو دحام : بس النقطة وين انو بيعطي الفقير يشتريلو بيرة ومابخلي حدا يعرف, يعني صاح لهالفقير فرحان لبيتو مشان يجبلو بيرة عاساس محدا يشوفو
أبو غازي : بس المحدلله انا قدرنا نشوفو لفرحان بعد مابعثو أبو محمود وعرفناه نذل
أبو غازي : ياأخي ماحبيتو لهالزلمة
أبو دحام : شي طبيعي تكرهو لأني امثالو من السفلة قلال , استنى لصيح لأبني يسويلنا كاسة شاي
أبو غازي : الله يخليلك ياه . ابنك متزوج
أبو دحام : لا ولله , عمندورلو عبنت الحلال وبماأنك فتحت هالسيرة حابب أخذ كريمتك لأبني ولله بشرفني ناسب الأصيلين
أبو غازي : ولله نحن يالي منتشرف بيك ويشهد الله انك زلمة محترم وطلب الطيبين أمثالك أمر
أبو غازي : شايف هذا فرحان رجع طلع من عند أبو محمود ليكون ماعبت معو قنينة بيرة وحدة
أبو دحام: هلق بسألو ليش رجع , فرحان تعى لهون لشوف
فرحان : جاييك, انا أصلا جاي لعندك
أبو دحام : ليش جاي لعندي ؟
فرحان : بقلك أبو محمود انو بدو قنينة وسكي هالمرة مثل هذيك القنينة يالي اشتراها من عندك الاسبوع الماضي
أبو غازي فاتحا تمه مندهشا : شو عمتقول انت
أبو دحام مرتبكا : ليكون مخربط يافرحان
أبو غازي : ولك شلون مخربط الزلمة جاي لعندك
أبو دحام : الله وكيلك باعو ياها الأجير يالي بيشتغل عندي جبلو ياها توصاي من دون ماأعرف
أبو غازي : حاج تكذب وفوقها عامل حالك شريف وقاعد تحكي على أبو محمود وبدك تخطب بنتي كمان
أبو دحام : ولك لا تشبهني بأبو محمود
أبو غازي : انتو الأثنين اضرب من بعض الحمد لله كشفتكم على حقبقتكم قهوتك مشروبة بخاطرك
أبو دحام : طول بالك لنشوف شو القصة من فرحان
فرحان مقاطعا لهما : خلصتو خناق , ان شالله تكسرو بعض . أبو دحام عطيني قنينة وسكي وخلصني ,
أأبو غازي : عطيه وسكي لصاحبك
فرحان : معلمي أبو وحمود قال جاي لعندو ضيوف بدو يناسبهم ويخطب من عندهم بنت ومابحبو البيرة ومابشربو الا الوسكي
أبو دحام ضاحكا ومخاطبا أبوغازي : اهلين زميل , مابدك تخطبنا بنتك ؟
ابو غازي : صهري سبقك ) .



دائما تأخذنا الأقاويل ومنتسرع بالقاء الأحكام على الناس .
ياأخي لا تصدق حتى تشوف بعينك ومابكفي الشوف بالعين لنحكم عالبني آدم محتاجين عشرة مع الناس وزمن حتى نفهمم.

ودمتم سالمين

---------------------------------------------------------------------